殮房話事人驚喜看生死

八方人物：殮房話事人驚喜看生死　21/4/2008　張嘉雯

縱橫殮房35年，黎華佳遇過種種恐怖事、搞笑事，又親手處理過母親的遺體，生死皆付笑談中。　黃耀興攝

【蘋果】黎華佳，全港最資深殮房話事人，強項是游說家屬讓死者解剖，以及處理死者內臟，縱橫殮房35年，由當初驚驚青，到今年59歲，看盡生死的有趣、恐怖，今年底，正式退下火線。

由來佳哥直腸直肚，自爆當初「入殮房」，不是悲天憫人，只是現實地想有宿舍住，方便結婚，宿舍在殮房樓上，親戚朋友避之則吉，變相造就了清靜環境，「我唔會同人講話自己做殮房，話自己係醫院做化驗，以前尐人好驚架嘛！」
中五畢業的佳哥說，從前請人難，聘請過程好兒戲，最重要是夠大膽，直擊血淋淋解剖場面而沒有暈倒面青，就可以順利過關。最初「伴屍」，他也覺得好驚不習慣，解剖學的名詞又一竅不通，「初時俾尐醫生鬧到呢，鬧我咁淺都唔識，咁我咪自學羅。」
能夠在行內堅持多年，「學到野」是主要原因，「平時我地都會睇牌板，諗下個死因係乜，搵得到真係好大滿足感，人地唔知既野你知咁羅。」

最搞笑
「佢（目訓）係床既時候胸部仲好健美喎，我地個個都奇怪啦，『點解可以咁勁既？』。」佳哥憶述，曾經有一位40多歲的女死者，送來殮房解剖時胸部仍然堅挺，令一眾殮房員工嘖嘖稱奇，「原來有個水袋係入面，係隆胸！嘩，個醫生手術真係做得好好呀，完全冇疤痕，睇唔出，very good！」說完，豎起大拇指。

最恐怖「跳樓都係尐手手腳腳扭埋者，我都唔明點解尐救護員咁勁，仲有得搓（急救），入到黎醫院，如果入唔到黎，唔關我地事架嘛。」佳哥從來沒有遇過古怪事，覺得所謂古怪其實是「怪由心生」，之不過，也遇過恐怖事，「最記得有次有個司機入左黎，唔知係咪俾條柱插中呢度（額前），成塊面冇晒皮，眼同口都見唔到，得番尐肉，嚇到我成個人跳起呀。」

最貼身
一條龍認屍、簽字、提領遺體，佳哥試過。17年前，佳媽89歲，因為食道癌入住瑪麗，結果手術失敗，住院兩、三周後去世，於是他自己認屍、自己簽名，「人到左咁大年紀，始終都要去，對生死我好睇得開，唔去都去左咯，冇辦法，唔會咁緊張。」

得獎工作的熱誠，讓現時任職瑪麗醫院的佳哥得到醫院管理局今年 的傑出員工獎，最大的功績，是80年代直接接觸院長，爭取把屍格由42格增加到87格，到三年前加至103格，「因為個時真係冇位，逢親四日假期，就多到要擺地下，但又唔可以就咁擺喎，咪用木板擺係地面，再放上去，然後用兩、三部窗口式冷氣機頂住羅。」