蟹和尚

21/10/2011　阿鼻
【am730】先申報利益：我對蟹是零興趣的，絕對不會跟各位蟹王蟹后爭食的。
但幾十歲仔，總食過蟹；而因為家裡沒有特別嗜蟹的人，也就沒人教過蟹該怎樣食，蟹蓋開了見到乜就掃入口，所以大家都不吃的蟹肺蟹腸蟹心，我都不明不白地吃過。
當然也吃過蟹和尚。

蟹和尚，不是一個「蟹黃穿腸過，佛祖心中留」的高僧，而是指蟹的胃。你打開蟹蓋，吃清蟹膏蟹黃之後，把蓋內蟹眼之間的一層深色薄膜切開，拎出裡面那舊野拿出 來反轉一看，便可以參見圖中這位大師－－蟹胃裡面除了蟹吃過的東西，還含有大量泥沙，懂食的人都會扔掉；不知何時有位仁兄發現這個垃圾部位竟然像煞和尚打坐，刮得光光的頭以至一身袈裟都齊備。
睇極都唔覺似？就當係去大陸尐鐘乳石溶洞玩囉！「拿個個就係孫悟空～拿拿拿呢邊係仙人拜日～仲有上面呢舊，劉三姐送白馬郎，係咪好似呢？」覺得似就似啦，唔似都唔影響隻蟹好唔好食既。
既然蟹肚裡有位和尚，我們中國人當然要來編一下劇：話說許仙同白娘子好地地兩情相悅，法海和尚出家生活太悠閒便來管人家的人妖戀，搞到民怨沸騰，騰到入玉皇大帝耳邊，玉帝便派兵下凡捉拿法海；法海大師慌忙逃到陽澄湖邊，眼看就要就擒，情急之下便躲到蟹蓋內。
咁都得？是但啦，唔影響隻蟹掂唔掂。
食蟹呢，我覺得真係好麻煩，食野者，搞到好似瑞士製錶匠咁細心，何不食蟹柳呢？